ନିୟମିତ ଯୋଗ କ୍ରିୟାର ପରିଣାମ କାହାକୁ ଅଛପା ନାହିଁ । କିନ୍ତୁ ନିୟମିତ ଯୋଗାଭ୍ୟାସ ଜାରି ରଖିବା ପ୍ରାଥମିକ ପର୍ଯ୍ୟାୟରେ ଅସମ୍ଭବ ମନେହୋଇଥାଏ । ମାତ୍ର କିଛି ଦିନର ଅଭ୍ୟାସ ପରେ ଶରୀର ଯୋଗାଭ୍ୟାସ ସହିତ ଅଭ୍ୟସ୍ତ ହେବାପରେ ପୂର୍ବ ସମସ୍ୟା ଦୂର ହୋଇଯାଏ । ଧୀରେଧୀରେ ଜୀବନଚର୍ଯ୍ୟା ଶୃଙ୍ଖଳିତ ହେବା ସହ ସମୟର ସଦଉପଯୋଗ ବୃଦ୍ଧି ପାଏ ।
ଯୋଗାଭ୍ୟାସ ଓ ଆୟୁର୍ବେଦର ସଠିକ୍ ଉପଯୋଗ ଦ୍ୱାରା ଯେକୌଣସି ବ୍ୟକ୍ତି, ନିଜକୁ ରୋଗମୁକ୍ତ ରଖିବା ସହ ମାନସିକ ଭାବେ ସର୍ବଦା ପ୍ରସନ୍ନ ରହିଥାନ୍ତି । ବୈଦିକ କାଳରୁ ଏହାର ହଜାର ହଜାର ଉଦାହରଣ ରହିଛି । ଶରୀର ରୋଗାକ୍ରାନ୍ତ ହେବାର ମୁଖ୍ୟ କାରଣ ଶରୀରରେ ଉପସ୍ଥିତ ଥିବା ତ୍ରିଦୋଷ ସ୍ଥିତି ଉପରେ ନିର୍ଭର କରିଥାଏ । ନିୟମିତ ଯୋଗ କ୍ରିୟା ଶରୀରରେ ସନ୍ତୁଳନ ବଜାୟ ରଖିଥାଏ ।
ଘରେ ଯୋଗ ଆରମ୍ଭ କରିବା ପୂର୍ବରୁ ସାବଧାନତା
କୁହାଯାଏ ବିନା ଗୁରୁରେ ସିଦ୍ଧି ଅସମ୍ଭବ । କୌଣସି କାର୍ଯ୍ୟ ପ୍ରଥମେ ଆରମ୍ଭ କରିବା ସମୟରେ ପୂର୍ବରୁ ସେହି କାର୍ଯ୍ୟ କରିସାରିଥିବା ବ୍ୟକ୍ତିଙ୍କ ପରାମର୍ଶ ଗ୍ରହଣ କରିବା ବୁଦ୍ଧିମାନର କାର୍ଯ୍ୟ ନିଶ୍ଚୟ । କାରଣ ନିଜସ୍ୱ ଅନୁଭବରୁ ଓ ଭୂଲରୁ ଶିକ୍ଷାଲାଭ କରି ଜଣେ ହୁଏତ ସଫଳ ହୋଇପାରେ, କିନ୍ତୁ ଏଥିପାଇଁ ଅଧିକ ସମୟର ଆବଶ୍ୟକତା ପଡ଼ିଥାଏ । କିନ୍ତୁ କୌଣସି ଅଭିଜ୍ଞ ବ୍ୟକ୍ତିଙ୍କଠାରୁ ଶିକ୍ଷାଗ୍ରହଣ ଦ୍ୱାରା ଖୁବ କମ ସମୟରେ ଏବଂ ବିନା ବାଧାରେ ଜଣେ ସିଦ୍ଧ ହୋଇପାରେ । ତେଣୁ ଯୋଗ କରିବା ପୂର୍ବରୁ ଜଣେ ଅଭିଜ୍ଞ ଗୁରୁଙ୍କ ପରାମର୍ଶ ନେବା ସର୍ବୋତ୍ତମ । କାରଣ ଆଖିକୁ ସହଜ ଦିଶୁଥିବା ଯୋଗକ୍ରିୟା ବାସ୍ତବରେ ସହଜ ନୁହେଁ । ଏହା ଏକ ଦୀର୍ଘ ସାଧନା । ଯୋଗ କରିବା ପୂର୍ବରୁ ଶାରିରୀକ ସ୍ତରରେ ପ୍ରସ୍ତୁତି ସହିତ ମାନସିକ ପ୍ରସ୍ତୁତି ଅତ୍ୟନ୍ତ ଜରୁରୀ । ନଚେତ ଭୂଲ ଅଙ୍ଗଭଙ୍ଗୀ ଅଭ୍ୟାସ କରିବାର ପରିଣାମ ମଧ୍ୟ ସାଙ୍ଘାତିକ ହୋଇପାରେ ।
ଯୋଗ ଆରମ୍ଭ କରିବା ପୂର୍ବରୁ ନିଜ ଶରୀରକୁ ଭଲ ଭାବେ ବୁଝିବା ଆବଶ୍ୟକ । ସ୍ଥାନ, କାଳ ସହିତ ନିଜ ଶରୀରର ସକ୍ଷମତା ଓ ଦୁର୍ବଳତାକୁ ମଧ୍ୟ ପରଖି ନେବା ଜରୁରୀ । ଏହାପରେ ଯୋଗଗୁରୁଙ୍କ ପରାମର୍ଶ ଆଧାରରେ ନିୟମିତ ଅଭ୍ୟାସ ଜାରି ରଖିଲେ ଯୋଗ କ୍ରିୟାର ଲାଭ ଅନୁଭବ କରିପାରିବେ ।
Also Read: Confusion to Conclusion: କିପରି ଓ କେଉଁଠୁ ଆରମ୍ଭ କରିବେ ଯୋଗ? ପ୍ରଥମେ କଣ କରିବେ
ଯୋଗ ଦ୍ୱାରା ତ୍ରିଦୋଷ (ବାତ, ପିତ୍ତ, କଫ) ସନ୍ତୁଳିତ ରହିଥାଏ । ଦିନର ଭିନ୍ନ ଭିନ୍ନ ସମୟ, ଋତୁ ଅନୁସାରେ ତ୍ରିଦୋଷର ପ୍ରକୋପ ଓ ସମନ, ପ୍ରକୃତି ଦ୍ୱାରା ପରିବର୍ତ୍ତିନ ହୋଇଥାଏ । ନିଜ ଶରୀରକୁ ଉତ୍ତମ ଭାବେ ଜାଣିବା ସହିତ ଦିନଚର୍ଯ୍ୟାରେ ଯୋଗ ଓ ଆୟୁର୍ବେଦକୁ ସାମିଲ କରିପାରିଲେ ସୁଫଳ ମିଳିବା ସୁନିଶ୍ଚିତ ।
କେବଳ ଯୋଗର ଉପକାରିତା ଓ ଲାଭ ବିଷୟରେ ଜାଣି କିମ୍ବା ଶୁଣି ଯୋଗ କରୁଥିବା ବ୍ୟକ୍ତି ଲାଭ ବଦଳରେ ବେଶୀ କ୍ଷତି ସହିଥାନ୍ତି । କାରଣ ଯଦି ଯୋଗ ଏକ ଉତ୍ତମ ପର୍ଯ୍ୟାୟର ବୀଜ ବା ମଞ୍ଜି ହୁଏ, ଆମ ଶରୀର ହେଉଛି ମାଟି ବା କ୍ଷେତ । ମାଟିର ଉର୍ବରତା ଉପରେ କୌଣସି ମଞ୍ଜିର ଅଙ୍କୁରୋଦଗମ୍ ନିର୍ଭରଶୀଳ। ତେଣୁ ଯୋଗ ଆରମ୍ଭ କରିବା ପୂର୍ବରୁ ଉଭୟ ଶାରୀରିକ ଓ ମାନସିକ ପ୍ରସ୍ତୁତି ଅତ୍ୟନ୍ତ ଜରୁରୀ ।
ଘରେ ଯୋଗ ପାଇଁ ନିୟମ
ଯୋଗକୁ ସଠିକ୍ ଭାବେ ନବୁଝି, ଅନ୍ୟ ଦ୍ୱାରା ପ୍ରଭାବିତ ହୋଇ ଯୋଗ ଆରମ୍ଭ କଲେ ହୁଏତ ଆପଣ ସୁଫଳ ପାଇପାରିବେ ନାହିଁ। ତେଣୁ ଯୋଗ ଆରମ୍ଭ ପୂର୍ବରୁ କିଛି ଜରୁରୀ ନିୟମ ମଧ୍ୟ ଜାଣିନେବା ଆବଶ୍ୟକ । ନିମ୍ନଲିଖିତ ନିୟମ ଗୁଡ଼ିକର ଅନୁପାଳନ ସହ ଯଦି ଆପଣ ଘରେ ନିୟମିତ ଯୋଗାଭ୍ୟାସ ଜାରି ରଖନ୍ତି, ଯୋଗ ଆପଣଙ୍କ ମନ ଓ ଶରୀର ପାଇଁ ଲାଭଦାୟକ ହେବା ସମ୍ଭାବନା ରହିଛି ।
Also Read: Scientific Benefits of Yoga: ଯୋଗ ଦୂର କରେ ରୋଗ
ଯୋଗ ଆରମ୍ଭ କରିବା ପୂର୍ବରୁ ଜରୁରୀ ସତର୍କତା ଓ ସାବଧାନତା
- ଯୋଗ କରିବା ପୂର୍ବରୁ ସ୍ୱାସ୍ଥ୍ୟ ପରୀକ୍ଷା କରାଇ ନେବା ଆବଶ୍ୟକ ।
- ଯୋଗ ଆରମ୍ଭ କରିବା ପୂର୍ବରୁ ଡାକ୍ତରୀ ପରାମର୍ଶ ଗ୍ରହଣ କରନ୍ତୁ, ଅସୁସ୍ଥ ଥିଲେ ଯୋଗ କରିବା ଅନୁଚିତ ।
- ଯୋଗ କରିବା ପାଇଁ ନିର୍ଦ୍ଦିଷ୍ଟ ସମୟ ଚୟନ କରନ୍ତୁ, ସକାଳ ଓ ସନ୍ଧ୍ୟା ସମୟ ଯୋଗ କରିବା ପାଇଁ ପ୍ରକୃଷ୍ଠ ସମୟ ।
- ଯୋଗ କରିବା ପୂର୍ବରୁ ନିତ୍ୟକର୍ମ ଶେଷ କରିବା ଉଚିତ ।
- ଯୋଗ କରିବା ପୂର୍ବରୁ ପେଟ ଖାଲି ରଖିବା ଜରୁରୀ ।
- ଖାଦ୍ୟ ଗ୍ରହଣର ଅତି କମ୍ ରେ ୫ରୁ ୬ ଘଣ୍ଟା ପରେ ଯୋଗ କରିପାରିବେ ।
- ଘରେ ଯୋଗ କରୁଥିଲେ କବାଟ, ଝରକା ଖୋଲା ରଖନ୍ତୁ । ପ୍ରଚୁର ଅମ୍ଳଜାନ ଉପଲବ୍ଧ ହେଉଥିବା ସ୍ଥାନ ଯୋଗ କରିବା ପାଉଁ ପ୍ରକୃଷ୍ଟ ସ୍ଥାନ।
- ଯୋଗ କରୁଥିବା ସ୍ଥାନ ପ୍ରଦୂଷଣମୁକ୍ତ ହୋଇଥିବା ନିହାତି ଜରୁରୀ ଅଟେ ।
- ଯୋଗ କରିବା ସମୟରେ କୌଣସି ଖାଦ୍ୟ କିମ୍ବା ପାନୀୟ ଗ୍ରହଣ କରନ୍ତୁ ନାହିଁ ।
- ଆପଣଙ୍କ ସାଧ୍ୟ ଅନୁସାରେ ୧୫ ମିନିଟରୁ ୧ ଘଣ୍ଟା ପର୍ଯ୍ୟନ୍ତ ଯୋଗ କରିପାରିବେ ।
- ଶରୀର ତାପମାତ୍ରା ସ୍ୱାଭାବିକ ହେବା ପରେ (୨୦ରୁ ୩୦ ମିନିଟ ପରେ)ତମ୍ବା କିମ୍ବା ମାଟି ପାତ୍ରରେ ସଂଗୃହୀତ ଥଣ୍ଡା ପାଣି ପିଅନ୍ତୁ ।
- ଯୋଗ କରିବାର ଅଧାଘଣ୍ଟା ପରେ ସ୍ନାନ କରିପାରିବେ ।
Also Read: Yogasana: ମାନବ ଶରୀର ପାଇଁ ଯୋଗାସନର ମହତ୍ୱ ଓ ଗୁରୁତ୍ୱ
ଯୋଗ ଜୀବନର ଏକ ଧାରା । ନିଜକୁ ପୁନଃ ଆବିଷ୍କାର କରିବା ପାଇଁ ଯୋଗ ମଣିଷକୁ ସାହାଯ୍ୟ କରିଥାଏ । ଆବାଳବୃଦ୍ଧବନିତା ସମସ୍ତଙ୍କ ପାଇଁ ଯୋଗ ଅତ୍ୟନ୍ତ ଉପଯୋଗୀ ସାବ୍ୟସ୍ତ ହେଉଛି । ବର୍ତ୍ତମାନ ସମୟରେ ମାନସିକ ଚାପ ବା ଷ୍ଟ୍ରେସ୍ ଏକ ଅପ୍ରତିହତ ଦୁର୍ଦ୍ଧର୍ଷ ଶତ୍ରୁ ଭାବେ ଉଭା ହୋଇଛି । ଶାରୀରିକ ଶ୍ରମ ପ୍ରତି ଲେକଙ୍କ ବିମୁଖତା ବୃଦ୍ଧି ପାଇଚାଲିଛି । ଏହାଫଳରେ ପୃଥୁଳତା, ଉଚ୍ଚରକ୍ତଚାପ, ହୃଦରୋଗ, ହାର୍ଟଷ୍ଟ୍ରୋକ୍, ଡାଇବେଟିସ୍, ଗଣ୍ଠି ଯନ୍ତ୍ରଣା, ଆଜମା, କ୍ୟାନସର ଆଦି ଅଣସଂକ୍ରାମକ ରୋଗ ବଢ଼ିଚାଲିଛି ।
ଏପରି ସମସ୍ୟାର ସହଜ ସମାଧ୍ୟାନ ହେଉଛି ଯୋଗ ସାଧନା । କାରଣ ଯୋଗ ହିଁ ଅସ୍ଵାଭାବିକ ମାନସିକ ଚାପର ଉଚିତ ମୁକାବିଲା କରିବାକୁ ଶରୀରକୁ ଶକ୍ତି ଯୋଗାଇ ପାରିବ । ଶାରୀରିକ, ମନସ୍ତାତ୍ତ୍ୱିକ ଓ ସାମାଜିକ ଅସୁସ୍ଥତାକୁ ଦୂର କରିବାରେ ଯୋଗସାଧନାର ପ୍ରାୟତଃ ବିକଳ୍ପ ନାହିଁ ।
0 Comments