ଯୋଗ ଏକ ସଚେତନ କ୍ରିୟା, ଯାହା ଶରୀରକୁ ମନ ସହିତ, ଜୀବନକୁ ପ୍ରକୃତି ସହିତ ଉତ୍ତମ ସଂଯୋଗ କରାଇଥାଏ । ଯୋଗ ବିଷୟରେ ଏପରି କଥା ଶୁଣି ଯେକୌଣସି ବ୍ୟକ୍ତି ଯୋଗ କରିବାକୁ ଇଚ୍ଛା କରିବା ସ୍ୱାଭାବିକ । କାରଣ କେବଳ ଶରୀର ଓ ସମୟ ବିନିଯୋଗ ଦ୍ୱାରା ଏତେ ସବୁ ଲାଭ ପ୍ରାପ୍ତିର ଆଶା, ଲୋକଙ୍କୁ ଆକର୍ଷିତ କରିଥାଏ । କିନ୍ତୁ କୌଣସି ମାଧ୍ୟମରେ ଯୋଗ ନାମରେ କିଛି ଅଙ୍ଗଭଙ୍ଗୀର ଅଭ୍ୟାସ କରିବା ପରେ ମଧ୍ୟ କୌଣସି ଲାଭ ମିଳିନଥାଏ । ବରଂ ସମୟର ଅପଚୟ ହେବା ସହ ଶାରୀରିକ ପୀଡ଼ା ହିଁ ପ୍ରାପ୍ତ ହୋଇଥାଏ । ଯୋଗ ବିଦ୍ୟାର ସୃଷ୍ଟି ହୋଇଥିବା ଭାରତ ମାଟିରେ ଆଜି ଯୋଗକୁ ନେଇ ଲୋକଙ୍କ ମନରେ ନାନା ଦ୍ୱନ୍ଦ୍ୱ ଲାଗି ରହିଛି । ପାଶ୍ଚାତ୍ୟର ପ୍ରଭାବରେ ଆକର୍ଷକ ଢଙ୍ଗରେ ପ୍ରଦର୍ଶିତ ଅଙ୍ଗଭଙ୍ଗୀକୁ ଯୋଗ ମନେ କରୁଛନ୍ତି ସାଧାରଣ ଲୋକେ । ଯାହା ଭାରତୀୟ ଯୋଗ ସଂସ୍କୃତି ପ୍ରତି ତୀବ୍ର ଅପମାନ ନିଶ୍ଚୟ ।
Also Read: Confusion to Conclusion: କିପରି ଓ କେଉଁଠୁ ଆରମ୍ଭ କରିବେ ଯୋଗ? ପ୍ରଥମେ କଣ କରିବେ
ଆପଣଙ୍କ ଶରୀର ଆପଣଙ୍କର ହିଁ ନିର୍ମାଣ
ଶରୀରକୁ ଆପଣ ପବିତ୍ର ମନ୍ଦିରଟିଏ ନିର୍ମାଣ କରିବେ କିମ୍ବା ବାଲୁକା ସ୍ତୁପ କରିବେ ତାହା ସମ୍ପୂର୍ଣ୍ଣ ଆପଣଙ୍କ ଉପରେ ନିର୍ଭର କରେ । ପ୍ରତିଟି ସମସ୍ୟା, ଯନ୍ତ୍ରଣା, ବ୍ୟାଧିର କାରଣ ଆପଣ ନିଜେ, କାରଣ ଆପଣ କେତେବେଳେ, କେତେ ପରିମାଣରେ କେଉଁ ଖାଦ୍ୟ ଓ ପାନୀୟ ଗ୍ରହଣ କରିବେ ଏହି ନିଷ୍ପତ୍ତି ମଧ୍ୟ ଗ୍ରହଣ କରନ୍ତି ।
ସମୟ ଓ ସ୍ୱାସ୍ଥ୍ୟ ଏପରି ସମ୍ପଦ, ସମାପ୍ତି ପୂର୍ବରୁ ମଣିଷ ଏହାର ମୂଲ୍ୟ କଳି ପାରେନି । ଯେଉଁ ବ୍ୟକ୍ତି ଉଭୟ ଶରୀର ଓ ସମୟର ମୂଲ୍ୟକୁ ସଠିକ ଭାବେ କଳି ନେଇପାରେ, ସେ ପୂର୍ଣ୍ଣାଙ୍ଗ ଜୀବନକୁ ଉପଭୋଗ କରିବ ନିଶ୍ଚୟ । ଏକଥା ସତ୍ୟ ଯେ ଆମେ ଆଜି ବୟସର ଯେଉଁ ସୋପାନରେ ପହଞ୍ଚିଛନ୍ତି ବା ଆମର ବର୍ତ୍ତମାନର ସ୍ୱାସ୍ଥ୍ୟ ସ୍ଥିତି ଯେପରି ରହିଛି, ଆମେ ଏପରି ଜନ୍ମ ହୋଇନଥିଲେ । ଖୁବ ଛୋଟ ଶରୀରଟିଏ ନେଇ ଆମେ ମା' କୋଳ ମଣ୍ଡନ କରିଥିଲେ ।
ତେବେ ଆମ ଶରୀର ବିକଶିତ ହୋଇଥିଲା କିପରି? ଖାଦ୍ୟ, ପାନୀୟ ହିଁ ଧୀରେଧୀରେ ଆମ ଶରୀରକୁ ବିକାଶ କରାଇଥିଲା । ପୂର୍ବ ପିଢିରୁ ମିଳିଥିବା ଜେନେଟିକ ମେମୋରୀ ଦ୍ୱାରା ଆମ ଶରୀର ଆମେ ଗ୍ରହଣ କରୁଥିବା ଖାଦ୍ୟ ଓ ପାନୀୟକୁ ରକ୍ତ, ହାଡ଼, ମାଂସକୁ ରୁପାନ୍ତରିତ କରୁଥିଲା । ଏହାସହିତ ବାହ୍ୟ ପରିବେଶ, ପ୍ରକୃତି ହିଁ ଆମର ମାନସିକ ବିକାଶ ଘଟାଇଥିଲା । ଅର୍ଥାତ ଖାଦ୍ୟ ଓ ପାନୀୟ ହିଁ ଆମ ଶରୀର ଗଠନର ମୂଳ ଉତ୍ସ ।
ଏଥିପାଇଁ ଭାରତୀୟ ସଂସ୍କୃତିରେ ଖାଦ୍ୟ ଓ ପାନୀୟକୁ ଜୀବନ ନିର୍ମାଣକାରୀ ଉପାଦାନ ଭାବେ ଗ୍ରହଣ କରାଯିବା ସହ ଏହାର ସତେତନ ବ୍ୟବହାର କରିବାକୁ କୁହାଯାଉଥିଲା । ମାନବ ଶରୀରର ଉତ୍ତମ ବିକାଶ ପାଇଁ ସାତ୍ତ୍ୱିତ ଆହାର ଓ ସୁଦ୍ଧ ଜଳ ଅପରିହାର୍ଯ୍ୟ । ଶରୀରର ୭୨ ପ୍ରତିଶତ ଜଳ ହୋଇଥିବାରୁ ଜଳ ପ୍ରତି ସର୍ବାଧିକ ସତେତନତା ମଧ୍ୟ ଆବଶ୍ୟକ ।
Also Read: Yogasana: ମାନବ ଶରୀର ପାଇଁ ଯୋଗାସନର ମହତ୍ୱ ଓ ଗୁରୁତ୍ୱ
ଜଳ ହିଁ ଜୀବନ, ଜଳକୁ ଜାଣିଲେ ଜୀବନ ସ୍ୱଚ୍ଛଳ
ପାଣିର ଉପଯୁକ୍ତ ବ୍ୟବହାର ଶରୀରକୁ ନିରୋଗ ରଖିବା ସହ ଶରୀରର ତ୍ରିଦୋଷ (ବାତ୍ତ,ପିତ୍ତ ଓ କଫ)କୁ ସନ୍ତୁଳିତ ରଖିଥାଏ । ଅର୍ଥାତ ଠିକ୍ ସମୟରେ, ଠିକ୍ ପରିମାଣରେ ପାଣି ପିଇଲେ ଶରୀର ପ୍ରତି ସୁପ୍ରଭାବ ପଡ଼ିଥାଏ । ଶରୀର ଆବଶ୍ୟକ କରୁଥିବା ସମୟରେ ପାଣି ପିଇବା ଆବଶ୍ୟକ । ଅଧିକ ନୁହଁ କିମ୍ବା କମ ବି ନୁହେଁ । କେତେ ପାଣି ପିଇବା ଆବଶ୍ୟକ, ଏହାର କୌଣସି ସଠିକ ଉତ୍ତର ନାହିଁ । କାରଣ ଆପଣଙ୍କୁ ହିଁ ଆପଣଙ୍କ ଶରୀରର ଆବଶ୍ୟକତା ଅନୁଭୂତ ହୋଇଥାଏ ।
ସଚେତନ ଜଳ ବ୍ୟବହାର ପ୍ରଥମ ଉପାୟ:
ସକାଳେ ଖାଲିପେଟରେ ୮୦୦ରୁ ୧୦୦୦ ମିଲିଲିଟର ପାଣି ପିଅନ୍ତୁ । ନିଦରୁ ଉଠିବା ପରେ ସର୍ବପ୍ରଥମେ ପାଣି ପିଇବା ଆବଶ୍ୟକ । ଏହି ଅଭ୍ୟାସ ଆପଣଙ୍କ ଅନେକ ସ୍ୱାସ୍ଥ୍ୟ ସମସ୍ୟା ସମାଧାନ କରିବା ସହ ଓଜନ ସନ୍ତୁଳିତ ରଖିଥାଏ । ଶରୀରର ଓଜନ ବୃଦ୍ଧି ଘଟିଥିଲେ ଉଷୁମ ପାଣି ପିଇଲେ ସୁଫଳ ମିଳିଥାଏ । ବାସି ମୁହଁରେ ପାଣି ପିଇବା ଦ୍ୱାରା ଆଣ୍ଟି-ମାଇକ୍ରୋବିୟଲ ଗୁଣଯୁକ୍ତ ପଜିଟିଭ ବ୍ୟାକ୍ଟେରିଆ ପେଟକୁ ଯାଇଥାଏ । ଯାହା କ୍ଷତିକାରକ ମାଇକ୍ରୋବ୍ସକୁ ନଷ୍ଟ କରିବାରେ ସାହାଯ୍ୟ କରିଥାଏ ।
ସଚେତନ ଜଳ ବ୍ୟବହାର ଦ୍ୱିତୀୟ ଉପାୟ-
ଖାଦ୍ୟ ଖାଇବାର ଏକ ଘଣ୍ଟା ପୂର୍ବରୁ ଓ ଖାଦ୍ୟ ଖାଇବାର ଘଣ୍ଟାଏ ପରେ ପାଣି ପିଅନ୍ତୁ । ଏହାଦ୍ୱାରା ଖାଦ୍ୟ ହଜମ କ୍ରିୟା ସହଜ ହୋଇଥାଏ । ଶରୀର ଓଜନ ବୃଦ୍ଧି ହୋଇଥିଲେ ହ୍ରାସ କରିବାରେ ସାହାଯ୍ୟ କରିଥାଏ ।
ସଚେତନ ଜଳ ବ୍ୟବହାର ତୃତୀୟ ଉପାୟ-
କେବଳ ଆଖିକୁ ସୁଦ୍ଧ ଦୃଶ୍ୟମାନ ହେଉଥିବା ଜଳକୁ ସୁଦ୍ଧ ବୋଲି ବିଚାର କରନ୍ତୁ ନାହିଁ । ଖଣିଜ ଲବଣ ଯୁକ୍ତ ଜଳ ହିଁ ସ୍ୱାସ୍ଥ୍ୟପ୍ରତି ସର୍ବୋତ୍ତମ । ଯାହାକୁ ଆଲକାଇନ ୱାଟର କୁହାଯାଏ । ଆପଣ ଘରେ ମଧ୍ୟ ଆଲକାଇନ ୱାଟର ପ୍ରସ୍ତୁତ କରିପାରିବେ । ତମ୍ବା ପାତ୍ର ଓ ମାଟିପାତ୍ରରେ ୬ ଘଣ୍ଟାରୁ ଅଧିକ ସମୟ ରହିବା ପରେ ଜଳର ଗୁଣବତ୍ତା ବିକଶିତ ହୋଇଥାଏ । ତେଣୁ ବିଶୋଧିତ ହୋଇଥିବା ଜଳକୁ ମଧ୍ୟ ତମ୍ବା କିମ୍ବା ମାଟି ପାତ୍ରରେ ପୁନଃ ସଂଗୃହୀତ କରିବା ପରେ ଏହାକୁ ପାନୀୟ ଭାବେ ଗ୍ରହଣ କରିବା ଶରୀର ପାଇଁ ଉତ୍ତମ । ଏହାବ୍ୟତୀତ ଆପଣ ଜଳରେ ଆଲକାଇନ ଷ୍ଟୋନ କିଛି ସମୟ ବୁଡ଼ାଇ ରଖିବା ପରେ ଜଳ ଆଲକାଇନ ୱାଟରକୁ ପରିବର୍ତ୍ତିତ ହୋଇଯାଇଥାଏ ।
Also Read : Sun Salutation: ସୂର୍ଯ୍ୟ ନମସ୍କାରର ସଠିକ୍ ବିଧି, ଯୋଗାସନ ଓ ମନ୍ତ୍ର
ଜଳ ହିଁ ଜୀବନ
ଯେଉଁପରି ଗୋଟିଏ ପେଟ୍ରୋଲ ଚାଳିତ କାରରେ ଡିଜେଲ ପକାଯାଏ ନାହିଁ, ଠିକ ସେହିପରି ମଣିଷ ଶରୀର ପାଇଁ ଆବଶ୍ୟକ ଖାଦ୍ୟ ଗ୍ରହଣ କଲେ ଶରୀର ଅସୁସ୍ଥ ହେବ ନାହିଁ । ଆମେ ଯେଉଁ ଶରୀର ଧାରଣ କରନ୍ତି ତାହା କେବଳ ଖାଦ୍ୟ ଯୋଗୁଁ ହିଁ ସମ୍ଭବ ହୋଇଥାଏ । ଯେଉଁ ଖାଦ୍ୟ ଆମ ଶରୀର ଗଠନ କରେ, ବିନା ଶୋଚନାରେ ଯେକୌଣସି ପଦାର୍ଥକୁ ଖାଦ୍ୟ ଭାବେ ଗ୍ରହଣ କଲେ ଏପରିକି ପାଟିକୁ ସ୍ୱାଦିଷ୍ଟ ଲାଗୁଥିବା ବିଷାକ୍ତ ପଦାର୍ଥ ସେବନ କଲେ ଶରୀର ଅସୁସ୍ଥ ହେବା ସ୍ୱଭାବିକ । ପାରମ୍ପରିକ ଭାରତୀୟ ଆୟୁର୍ବେଦ ଶାସ୍ତ୍ର ଅନୁଯାୟା ଉତ୍ତମ ଆହାର ଓ ଶାରିରୀକ ପରିଶ୍ରମ ଶରୀରକୁ, ମନକୁ ଓ ଜୀବନକୁ ଆନନ୍ଦ ପ୍ରଦାନ କରେ ।
ସର୍ବପ୍ରଥମେ ଖାଦ୍ୟ ଓ ପାନୀୟ ପ୍ରତି ସଚେତନ ହେବା ପରେ ଯୋଗକୁ ଜୀବନ ସହ ସଂଯୋଗ କରିବା ଆବଶ୍ୟକ । ଅଷ୍ଟାଙ୍ଗ ଯୋଗସୁତ୍ରର ପ୍ରଥମ ସୁତ୍ର (ଯମ) ଅନୁସାରେ ଯୋଗ ସାଧକଙ୍କୁ ସର୍ବପ୍ରଥମେ ବାହ୍ୟ ଅନୁଶାସନକୁ ଗୁରୁତ୍ୱ ଦେବାକୁ ପଡ଼ିଥାଏ । ଯୋଗ କେବଳ ଏକ କ୍ରିୟା ନୁହେଁ ବରଂ ଏକ ଜୀବନ ଧାରା ।
ଖାଦ୍ୟ ଓ ପାନୀୟ ପ୍ରତି ସଚେତନତା ପରେ ଯୋଗାସନ, ଆପଣଙ୍କୁ ଜୀବନର ଉତ୍ତରିତ ସୋପାନରେ ପହଞ୍ଚାଇବ ନିଶ୍ଚୟ ।
0 Comments